Ysraýylyň premýer-ministri Binýamin Netanýahu halkara basyşyň güýçlenýän we Gaza sebitindäki agyrlaşýan gumanitar ýagdaýlaryň arasynda, bu zolaga ynsanperwer kömeginiň goýberilmeginiň täzeden ýola goýuljakdygyny mälim etdi.
Netanýahu 19-njy maýda çap eden wideo-ýüzlenmesinde kömegiň çäklendirilen görnüşde goýberilmegi baradaky kararyň “iş ýüzündäki we diplomatiki sebäplere” esaslanýandygyny aýtdy. Ysraýylyň Daşary işler ministrliginiň beýanatyna görä, duşenbe güni Gaza çaga iýmitli ýük ulaglary ugradylypdyr. Geljekki günlerde bu kömegiň giňeldilmegi meýilleşdirilýär, sebite azyk we derman ýükli onlarça ulagyň gelmegine garaşylýar.
Ynsanperwer kömeginiň gaýtadan goýberilmegi baradaky karar, mart aýynda Ysraýylyň Gazany berk gabawa almagyndan iki aýdan gowrak wagtdan soň kabul edildi.
Bu kömekleriň täzeden başlanylmagy Gazanyň günorta bölegindäki Han-Yunis etrabynda alnyp barylýan harby operasiýalara gabat geldi. Ysraýylyň goşuny ýerli ilaty ewakuasiýa bolmaga çagyrdy, Netanýahu bolsa Ysraýylyň “Gazanyň tutuş territoriýasyna gözegçilik etmegi maksat edinýändigini” nygtady.